Nepal's No. 1 Digital News Portal, Business, Corporate, Tourism, Politics, Sports, Entertainment, digitalkhabar.com ...express media network

चक्रीय अन्नपूर्ण पदमार्गमा बिदेशी पर्यटक ह्वात्तै बढे , स्थानीय उत्साहित

0 92

१९ असाेज, लमजुङ । चक्रीय अन्नपूर्ण पदमार्गमा पर्यटकको ओइरो लागेको छ । स्वदेशी तथा विदेशी पर्यटकका लागि पदमार्ग खुला भएपछि पर्यटक आउने क्रम बढ्न थालेको हो । यतिबेला पदमार्ग घुम्नका लागि विदेशी पर्यटक धमाधम आउने गरेका छन् । अन्नपूर्ण संरक्षण क्षेत्र आयोजना (एक्पाप) इलाका संरक्षण कार्यालय मनाङका अनुसार स्वदेशी भन्दा विदेशी पर्यटक बढी देखिएका छन् । अक्टोबर १ देखि अक्टोबर ४ सोमबारसम्म मात्रै पदमार्गमा ८५ जना पर्यटक आएको एक्याप मनाङका प्रमुख लेखनाथ गौतमले बताउनुभयो ।

उहाँका अनुसार अक्टोबर ३ आइतबार मात्रै ५९ जना मनाङ भित्रिएका छन् । इजरायलका ४२ जना र फ्रान्सका एक जना गरी ४३ जना (सात जना अपांगता भएका सहित) ठूलो समूह अन्नपूर्ण संरक्षण क्षेत्र आयोजना इलाका संरक्षण कार्यालय मनाङमा पुगेका छन् ।

यस्तै, धारापानी चेकजाँच केन्द्रबाट १६ जना विदेशी पर्यटक इन्ट्री भएका छन् । मनाङ गाउँ पुगेका पर्यटक याकखर्क पुगेर बस्ने छन् । हेलिकप्टर चार्टर गरेर हुम्डे आएका उनीहरु अन्नपूर्ण पदमार्गको थोराङ्ला पास गरी मुक्तीनाथ जोमसोमसम्म जाने छन् ।

सोमबार मात्रै २६ जना विदेशी पर्यटक धारापानी पर्यटक चेकजाँच केन्द्रमा इन्ट्री भएका छन् । एक्याप मनाङका अनुसार अक्टोबरको सुरुवातमा नै पर्यटक आगमन बढ्न थालेपछि पर्यटन व्यवसायी उत्साहित भएका छन् । कोरोना संक्रमणका कारण सुस्ताएको व्यवसाय पुनः मौलाउने आशा गरेका छन् । एक्यापका अनुसार सेप्टेम्बर महिनामा ७६ जना विदेशी पर्यटक मनाङ प्रवेश गरेका छन् ।

लमजुङको बेंसीसहरबाट सुरु हुने चक्रीय अन्नपूर्ण पदमार्ग मनाङ हुँदै मुस्ताङ, म्याग्दी भएर पोखरा पुगी टुंगिन्छ । यसअघि २१ दिने यात्रामा पूरा हुने उक्त पदमार्गको मुस्ताङ र मनाङका विभिन्न ठाउँसम्म सडक पुगेपछि यात्रा छोटिएर ७ देखि १० दिनमा धेरै पर्यटकले यात्रा टुङ्ग्याउने गरेका छन् ।



मल्टिमिडिया ग्यालरी

Comments

comments

Subscribe to our newsletter
Sign up here to get the latest news, updates and special offers delivered directly to your inbox.
You can unsubscribe at any time
Leave A Reply

Your email address will not be published.