नेकपा एकीकृत समाजवादी पार्टी निर्वाचन आयोगमा दर्ता
०४ भाद्र, काठमाडौँ । एमाले विभाजन गरी नयाँ दल दर्ताको लागि निवेदन दिएको माधवकुमार नेपाल समूहले आफ्नो दलको नामबाट एमाले झिकेको छ । अब नेपाल अध्यक्ष रहेको पार्टीको नाम ‘नेकपा एकीकृत समाजवादी’ रहने छ । यसअघि नेकपा एमाले (समाजवादी) नाम राखेर दल दर्ताको लागि निर्वाचन आयोगमा निवेदन दिए पनि आयोगले एमाले नाम जुधेको भन्दै नाम संशोधन गर्न भनेको थियो ।
‘अस्ति आएर एउटा निवेदन दिनुभयो । नियमावली संसोधन नभई आएको भएर त्यसले कानुनी मान्यता पाउँदैनथ्यो । आजबाट बाटो खुल्यो, नियमावली संशोधन भयो,’ प्रमुख निर्वाचन आयुक्त दिनेशकुमार थपलियाले भने, ‘एमालेले हाम्रो पार्टीसँग मिल्दो नाम भएको अर्काे पार्टी दर्ता नहोस् भनी आज निवेदन दियो । आयोगले पनि २०७७ फागुन २३ को फैसलासहित छलफल गरेर संशोधित नियमावलीको ढाँचा अनुरुप विवरण भर्न लगायो ।’
उनले नेकपा एकीकृत समाजवादी पार्टी दर्ता भइसकेको पनि बताए । ‘उहाँहरु संशोधित नियमावलीको ढाँचा अनुरुप दर्ता गर्न आउनु भयो । नेपाल कम्युनिष्ट पार्टी (एकीकृत समाजवादी) चाहिँ दर्ता नै भइसक्यो,’ थपलियाले भने । आयोगमा नयाँ दल दर्ताका लागि नेपाल समूहका राजेन्द्र पाण्डेसहितका नेताहरु पुगेका थिए ।