Advertisement
०६ असार, बीबीसी । उत्तर कोरियाली राष्ट्रप्रमुख किम जोङ उनले पहिलोपटक आधिकारिक रुपमा देशभर खाद्य वस्तुको चरम अभाव रहेको स्वीकार गरेका छन् । वरिष्ठ नेताहरुसँगको बैठकलाई सम्बोधन गर्दै किमले ‘जनताका लागि आवश्यक खाद्य सामग्रीको स्थिति चिन्ताजनक बन्दै गएको’ भनेर उल्लेख गरेका हुन् ।
यसमा गत वर्षको आँधी तूफान र देशव्यापी बाढीका कारण कृषि क्षेत्रले लक्ष्य अनुरुप अन्न उत्पादन गर्न नसकेको उनले बताएका हुन् ।
रिपोर्टका अनुसार उत्तर कोरियामा यतिबेला खाद्य वस्तुको भाउ अत्याधिक उचाइमा पुगेको छ जहाँ एक किलो केराको मूल्य नै ४५ डलरसम्म अर्थात नेपाली ५ हजार भन्दा धेरै रहेको एनके न्युजले जनाएको छ ।
कोभिड–१९ का कारण उत्तर कोरियाले आफ्नो सबै सिमानाहरु बन्द गरेको छ । यसैको परिणाम स्वरुप चीनसँगको सम्पूर्ण व्यापार अवरुद्ध भएको हो । उत्तर कोरिया खाद्य वस्तु, कृषिजन्य मल, इन्धन लगायतमा चीनमै भारी निर्भर रहँदै आएको छ । त्यसैले पनि दैनिक उपभोग्य वस्तुको अभाव समस्याजनक बन्दै गएको बताइएको छ । उता आणविक गतिविधिका कारण यसमाथि जारी अन्तर्राष्ट्रिय प्रतिबन्ध यथावत नै छ ।
राजधानी प्योङयोङमा भएको यस बैठकमा किमले अमेरिका र दक्षिण कोरियासँगको सम्बन्धबारे पनि छलफल गर्ने भनिएको थियो तर यस सम्बन्धी कुनै जानकारी बाहिर आएको छैन ।
Comments
