मेलम्ची खोलाकाे बहाब फेरि एक्कासी बढ्याे, यसअघिको भन्दा ठूलो बाढी आएको स्थानीयको भनाइ
Advertisement
०५ असार, काठमाडौं । मेलम्ची खोला फेरि एक्कासी बढेको छ । स्थानीय यसअघि बढेको भन्दा चार मिटर माथि बाढी आएको जानकारी गराएका छन् ।
सिन्धुपाल्चोकको मेलम्ची नदीमा फेरि बाढी आएको छ । पहिरोले नदी थुनिएर बनेको बाँध फुट्दा बुधबार राति आएको बाढीले मेलम्ची बजारमा ठूलो क्षति गरेको छ ।
शुक्रबार पानीको सतह निकै कम भएको थियो । तर साँझबाट फेरि बाढी आएको सिन्धुपाल्चोकका सहायक प्रमुख जिल्ला अधिकारी बाबुराम खनालले जानकारी दिएका छन् ।
“मेलम्चीमा फेरि भीषण बाढी आएको छ । करिब ९ बजेतिर एक्कासी नदीमा असार १ गतेको भन्दा पनि ठूलो बाढी आएपछि नदी तटीय क्षेत्रका स्थानीयको भागभाग भएको छ,” उनले भने ।
उनले काठपात बगाएको जानकारी गराउँदै नजिक रहेका स्थानीयलाई सचेत रहन आग्रह गरेका छन् । त्यसक्षेत्रमा बिजुली बत्ती पनि छैन ।
मेलम्ची क्षेत्रमा पानी नपरे पनि माथिबाट ढुंगा र माटोसहितको लेदो आएर नदी बढेको उनले जनाएका छन् ।
यसैबीच जल तथा माैसम विज्ञान विभागले शुक्रबार राति एक सूचना निकालेर सिन्धुपाल्चोककाे बाह्रबिसेस्थित भोटेकोशी नदीमा जलसतह सतर्कता तह आसपास रहेकोले नदी तटिय क्षेत्रमा शनिकार बिहानसम्म सतर्क रहन आग्रह गरेकाे छ ।
Comments
