Nepal's No. 1 Digital News Portal, Business, Corporate, Tourism, Politics, Sports, Entertainment, digitalkhabar.com ...express media network

कोरोना महामारीकाे कारणले बदलेकाे यौन जीवन

0 110

१९ बैशाख, बीबीसी । “कोरोना महामारी अघि धेरै दम्पती रातमा भेट हुने जहाज जस्ता थिए”, टेक्ससस्थित सेक्स थेरापिष्ट इमिली जामिया भन्छिन् । पहिले घरबाहिरका काममा बढी व्यस्त हुने दम्पतीका लागि लकडाउनले राहत प्रदान गर्यो । लामो समय घरमै बस्न बाध्य भएका उनीहरुले अन्तरंग समय बिताउने मौका पाए ।

तर लकडाउन बढ्दै जाँदा उनीहरुको यौन चाहनामा कमी आएको अध्ययनले देखाएको छ । अमेरिका, भारत, इटाली र टर्की लगायतका ५७ देशमा गरिएको यी अनुसन्धान अनुसार लकडाउन बढ्दै जाँदा जोडीमा यौन चाहना र निकटता घटेको पाइएको हो ।

“मलाई लाग्छ धेरै मानिसहरु तनावपूर्णस्थितिबाट गुज्रिरहेकाले यस्तो प्रभाव परेको हो,” किन्सी इन्स्टिच्युटका सामाजिक मनोविज्ञ जस्टिन लेमाइलरले भने ।

महामारीका कारण गरिएको लकडाउनले धेरैमा अनिश्चितता र त्रास सिर्जना गरेको थियो । धेरैले यसअघि कहिले नभोगेको स्वास्थ्यसम्बन्धी चिन्ता, वित्तिय असुरक्षा र अन्य महत्वपूर्ण परिवर्तनहरु भोगे ।

एकै व्यक्तिसँग लामो समयसम्म बन्द कोठामा बस्नुपर्दा र अन्य कारणले उत्पन्न तनावले गर्दा यौन चाहनामा कमी भएको अध्ययनकर्ताहरु बताउँछन् । एक प्रकारले कोभिड–१९ यौन सम्बन्धका लागि विषाक्त प्रमाणित भएको छ । के महामारी नियन्त्रण भएपछि हाम्रो यौन जीवन सामान्य बन्छ वा यौन जीवनमा यसले दीर्घकालीन असर गर्छ ?

सामाजिक मनोविज्ञ रोन्डा बल्जारिनीका अनुसार लकडाउनको सुरुको समय दम्पतीका लागि हनिमुन जस्तै थियो । मानिसहरु चिन्तालाई रचनात्मक ढंगले प्रतिक्रिया दिइरहेका थिए ।

“समय बित्दै जाँदा संसाधनहरुको अभाव हुन थाल्यो । यसले मानिसहरुलाई थप तनावग्रस्त बनायो,” बल्जारिनी भन्छिन्, “यस्तो हुँदा दम्पतीबीच समस्या बढेको देखिन्छ ।”

उनका अनुसार यस अध्ययनको ठूलो निष्कर्ष भनेको तनाव, डिप्रेसन र यौन चाहनाबीचको सम्बन्ध हो । महामारीको सुरुमा तनावग्रस्त व्यक्तिहरुमा डिप्रेसन ‘ट्रिगर’ नभइसकेको उनी बताउँछिन् । “जब तनाव लामो समयसम्म रहन्छ, मानिसहरु थकित हुन्छन् । र डिप्रेसनले यौन चाहनामा नकारात्मक प्रभाव पार्छ,” उनले भनिन् ।

महामारीले दैनिक जीवनमा ल्याएको तनावसँगै अस्पताल भर्ना हुने र मृत्युदर बढेपछि भाइरसको ठूलो खतरा महसुस गरियो । यो खतराले पनि दम्पतीको अन्तरंग मुड बिगार्न भूमिका खेल्यो ।

महामारीको सुरुमा दम्पतीहरु दिउँसो सँगै नुहाउनेजस्ता यौनाकांक्षा जगाउने कार्यमा संलग्न भएको पाइयो । सामान्यभन्दा ज्यादा कामुक यस्ता गतिविधिले दम्पतीको यौन चाहनामा कमी आएको बल्जारिनीको बुझाई छ ।

उनी यसलाई ‘ओभरएक्सपोजर इफेक्ट’ भन्छिन् । यसरी अति घुलमिल हुँदा आफ्नो पार्टनरको कतिपय साना साना व्यवहारले पनि रिस उठ्ने गर्छ । “दीर्घकालीन सम्बन्ध कायम राख्ने हो भने आफ्नो पार्टनरका बारेमा केही रहस्यको भावना र दूरी हुन आवश्यक छ,” उनी भन्छिन्, “एक अर्काको निकट भइरहँदा रहस्यको भावना हराउँछ ।”

यौन चाहना फर्काउन सकिन्छ त ?

दम्पतीको यौन जीवन सुधार गर्न यौन व्यवहारमा परिवर्तन ल्याउन अध्ययनकर्ताहरुले सुझाव दिएका छन् । अध्ययनमा सहभागी पाँच मध्ये एक जनाले बेडमा केही नयाँ प्रयास गरे, जसले यौन चाहना र आत्मियतालाई पुनर्जिवित गरेको पाइयो ।

तर यौन गतिविधि घटेको केही सम्बन्धले अहिलेसम्म गति लिन सकेको छैन । के यस्ता सम्बन्धमा स्थायी क्षति पुग्छ ? यो विषय विभिन्न कुरामा भरपर्ने विज्ञहरु बताउँछन् । लेमिलरका अनुसार केही सम्बन्ध ठीक नहुन पनि सक्छ । किनकि उनीहरुसँग निकै लामो समयसम्म निकटता थिएन ।

तर धेरै व्यक्तिका लागि भने आशाको सञ्चार पनि भएको छ । धेरै मानिसहरुले खोप लगाएसँगै व्यवसाय पुनः सुचारु भएपछि अधिकांश सम्बन्ध पुरानै अवस्थामा पुग्छन् । यसले दाम्पत्य जीवनमा सकारात्मक असर पर्नेे अध्ययनकर्ताहरु बताउँछन् ।


- Advertisement -


मल्टिमिडिया ग्यालरी

Comments

comments

Subscribe to our newsletter
Sign up here to get the latest news, updates and special offers delivered directly to your inbox.
You can unsubscribe at any time
Leave A Reply

Your email address will not be published.