Advertisement
१५ बैशाख, काठमाडौँ । बिहीबारदेखि काठमाडौँ उपत्यकामा लागू हुने भएपछि त्यसको असर आन्तरिक उडानमा परेको छ । आन्तरिक वायुसेवा प्रदायकहरू यतिबेला उडान थपेर धेरैभन्दा धेरै यात्रुलाई गन्तव्य पु-याउन व्यस्त छन् ।
निषेधाज्ञाअघि नै काठमाडौँ छाड्ने र भित्रिनेको हतारोले यात्रुहरूको चाप ऐतिहासिक रूपमा बढेको छ । यात्रु बढ्दा सामान्य दिनमाभन्दा उडान सङ्ख्या भने त्यहीअनुसार बढेको वायुसेवा प्रदायकहरूले जनाएका छन् ।
बुद्ध एयरका अनुसार मङ्गलबार मात्रै कम्पनीले देशका विभिन्न १२ वटा गन्तव्यमा दुवैतर्फ गरेर १४८ वटा उडान गरेको छ । उक्त उडानबाट सात हजार पाँच सयभन्दा बढी यात्रुले सेवा लिएको कम्पनीका सूचना अधिकारी दीपेन्द्र कर्णले जानकारी दिनुभयो ।
उहाँका अनुसार उडान र यात्रु सङ्ख्याको हिसाबले बुद्ध एयरको यो अहिलेसम्मकै उच्च सङ्ख्या हो । यसअघि बुद्धले औसतमा दैनिक १२०÷१२५ उडान र एकै दिनमा सबैभन्दा धेरै सात हजार तीन सय यात्रुलाई उडान सेवा प्रदान गरेको उहाँले बताउनुभयो ।
यती एयरका लागि पनि मङ्गलबार भ्याई नभ्याई नै रह्यो । दिनभर ७० वटा उडान गरेको यतीले तीन हजार एक सयभन्दा बढी यात्रुलाई उडान सेवा दिएको कम्पनीका प्रवक्ता सुदर्शन बर्तौलाले जानकारी दिनुभयो । उहाँका अनुसार यती एयरले मात्रै एकै दिनमा गरेको उडान र यात्रु सङ्ख्याका हिसाबले पनि यो अहिलेसम्मकै उच्च हो ।
उडान थप्दै
यात्रुहरूको अत्यधिक चाप परेपछि वायुसेवा कम्पनीहरू उडान थप्न बाध्य भएका छन् । मङ्गलबार मात्रै यतीले पाँचवटा उडान थपेको जनाएको छ । त्यस्तै बुद्धले पनि दुईतर्फी गरेर २० वटाभन्दा बढी उडान थपेको जनाएको छ ।
बुधबार पनि उडान थप्नुको विकल्प नरहेको कम्पनीहरूले जनाएका छन् । ‘रातभर पनि बुकिङ हुने सम्भावना उत्तिकै छ,’ यतीका बर्तौलाले भन्नुभयो, ‘यही हिसाबले बुधबार पनि उडान थप्नैपर्ने देखिन्छ । ’ उहाँका अनुसार मङ्गलबारको तुलनामा बुधबार उडान सङ्ख्या अझ थप हुन सक्नेछ । यतीले मङ्गलबार काठमाडौँदेखि जनकपुर र विराटनगर रुटमा बढी चाप रहेको जनाएको छ । बुद्धले भने उडान भइरहेका अधिकांश रुटमै माग बढेको जनाएको छ ।
निषेधाज्ञामा पनि उडान
निषेधाज्ञा लागू भए पनि आन्तरिक उडान नरोक्ने सरकारको निर्णयका कारण निषेधाज्ञा सुरु हुने बिहीबारका लागि राम्रै बुकिङ भइरहेको एयरलाइन्स कम्पनीहरूले जनाएका छन् ।
त्यसैअनुसार कम्पनीहरूले स्वास्थ्य प्रोटोकल पालना र उडान व्यवस्थापनको काम गरिरहेको पनि जानकारी दिएका छन् । तर सार्वजनिक यातायातमा प्रतिबन्ध लगाएका कारण विमानस्थलसम्म यात्रुलाई पुग्न अप्ठ्यारो हुने भएकाले त्यसलाई सहजीकरण गरिदिन वायुसेवा सञ्चालक सङ्घ, नेपालले सरकारलाई आग्रह गरेको थियो ।
सङ्घको आग्रहअनुसार मङ्गलबार भएको छलफलमा टिकट देखाएकै आधारमा विमानस्थलसम्म जान दिने सहमति भएको र त्यहीअनुसार मन्त्रालयमार्फत निर्देशन गराउने तयारी भएको नेपाल नागरिक उड्डयन प्राधिकरणका प्रवक्ता राजकुमार क्षेत्रीले जानकारी दिनुभयो ।
Comments
