Advertisement
१३ बैशाख, काठमाडौं ।
रामविनय दुई स्पर्धाको सेमिफाइनलमा
जनक शिक्षा सामग्री केन्द्र लिमिटेडका रामविनय श्रेष्ठ बाह्रौं सार्वजनिक संस्थान राष्ट्रिय खेलकुद प्रतियोगिताअन्तर्गत ब्याडमिन्टनको पुरुष सिंगल्समा आइतबार सेमिफाइनलमा प्रवेश गरेका छन् ।
सार्वजनिक संस्थान खेलकुद विकास संघ, नेपाल (पेस्डान) द्वारा आयोजित प्रतियोगितामा रामविनयले नागरिक लगानी कोषका पुरुषोत्तम पौडेललाई २१–१५ र २१–८ को सोझो सेटमा पराजित गरे ।
त्यसअघि रामविनयले औधोगिक क्षेत्र व्यवस्थापन लिमिटेडका रामबहादुर तामाङलाई २१–११ र २१–१८ को सीधा सेटमा हराएका थिए । सोही स्पर्धामा कृषि विकास बैंकका टक्कर कुँवरले नेपाल विद्युत प्राधिकरणका सरोज तामाङलाई ११–२१, २१–१६ र २१–१८, विद्युतका टेकबहादुर बुढाले राष्ट्रिय वाणिज्य बैंकका गोरखबहादुर शाहीलाई २१–१ र २१–१३ तथा वाणिज्यका गुप्ता केसीले विद्याुतका रत्न श्रेष्ठलाई ११–२१, २१–१९ र २१–१० ले पाखा लगाउदै सेमिफाइनलमा स्थान पक्का गरे ।
महिला सिंगल्समा बिमा संस्थानकी सविना श्रेष्ठले वाणिज्यकी पुष्पाकुमारी खनाललाई १५–२१, २१–१३ र २१–११ तथा वाणिज्यकी दुर्गाकुमारी कँडेलले नेपाल वायु सेवा निगमकी सविना बस्नेतलाई २१–१५ र २१–१८ ले पन्छ्याउदै सेमिफाइनल यात्रा तय गरे ।
त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा भइरहेको प्रतियोगितामा रामविनय पुरुष भेट्रान ४५ वर्षमाथि डबल्समा पनि सेमिफाइनलमा पुगेका छन् । रामविनयले जनक भारतीसंग मिलेर वाणिज्यका विश्वप्रसाद दाहाल र लालबहादुर थापाको जोडीलाई १८–२१, २१–१८ र २१–१८ को सेटमा पन्छाए । उक्त स्पर्धामा एभरेष्ट बैंक लिमिटेडका सन्तोष भट्टराई र पुष्पराज उप्रेती तथा विद्युतका उमेशकुमार भण्डारी र विष्णु मास्केको जोडीले पनि सेमिफाइनलमा स्थान सुरक्षित गरे ।
पुरुष डबल्समा मुक्तिनाथ विकास बैंकका थानेश्वर अर्याल
÷प्रेम थापा तथा विद्युतका भूपेन्द्र बिसी÷प्रितम बस्नेत, विष्णु मास्के÷सरोज तामाङ र राजु महर्जन÷लोकेन्द्रबहादुर साउदको जोडीले आ–आफ्नो खेल जित्दै सेमिफाइनलमा स्थान बनाए ।
प्रतियोगिताको राखेपका सदस्य–सचिव रमेशकुमार सिलवालले एक कार्यक्रमबीच उद्घाटन गर्दै कर्पोरेट क्षेत्रले खेलकुदको विकास र विस्तारमा ठूलो टेवा पु¥याउन सक्ने धारणा व्यक्त गरे ।
पेस्डानका अध्यक्ष कुलबहादुर आचार्यले कोरोना भाइरस (कोभिड– १९) को जोखिमलाई मध्यनजर गरी विगतमा विविध खेल समावेश गर्दै बृहत प्रतियोगिता आयोजना गर्ने गरेकोमा यसपटक ब्याडमिन्टन मात्रको प्रतियोगिता आयोजना गरिएको बताए ।
प्रतियोगितामा १२ संस्थाका ७० खेलाडीले विभिन्न ६ स्पर्धामा प्रतिस्पर्धा गरिरहेका छन् । सबै स्पर्धामा नगद पुरस्कार रहेको प्रतियोगिताको कुल पुरस्कार राशी १ लाख २२ हजार रुपैयाँ रहेको छ । प्रतियोगिता सोमबार सम्पन्न हुने छ ।
बक्सिङ टोली फर्कियो
पोल्यान्डको किल्सीमा भएको आइबा युथ पुरुष तथा महिला विश्व बक्सिङ च्याम्पियनसिपमा सहभागी २ खेलाडीसहित ३ सदस्यीय नेपाली बक्सिङ टोली आइतबार स्वदेश फर्किएको छ ।
अप्रिल १० देखि २४ तारिखसम्म भएको प्रतियोगितामा दुई महिला खेलाडीले नेपालको चुनौती प्रस्तुत गरेका थिए ।
सुष्मा तामाङ ४८ केजीमुनि क्वाटरफाइनलसम्म पुगेकी थिइन् ।
पहिलो चरणमा बाइ पाएकी सुष्माले प्रिक्वाटरफाइनलमा लिथुवानियाकी खेलाडीलाई पराजित गर्दै क्वाटरफाइनलमा प्रवेश गरेकी थिइन् । क्वाटरफाइनलमा सुष्मा आयोजक राष्ट्र पोल्यान्डकी खेलाडीसंग चुकेकी थिइन् । पोल्यान्डकी खेलाडीले प्रतियोगितामा रजत जितिन् ।
क्वाटरफाइनलमा पुगेसंगै सुष्माले युथतर्फ विश्व वरीयतामा छैटौं स्थान प्राप्त गरेको नेपाल बक्सिङ संघका प्रवक्ता श्याम अवालेले जनाएका छन् ।
यसअघि उक्त प्रतियोगितामा कुनैपनि नेपाली खेलाडी क्वाटरफाइनल पुग्न नसकेको नेपाल बक्सिङ संघले जनाएको छ । सुमिना खड्का ५४ केजीमुनि बेलारुसकी खेलाडीसंग पहिलो चरणमै पराजित भइन् । प्रशिक्षकमा ओम मास्के रहेका छन् ।
टोलीलाई नेपाल बक्सिङ संघका सदस्यद्वय पुस्करराज पन्त र मानबहादुर भण्डारी, बक्सिङका प्रमुख प्रशिक्षक प्रकाश थापा मगर, गोन्झाव एसियाडमा नेपाललाई एक्लो पदक दिलाएका बक्सिङका दीपक महर्जनलगायतले अन्तर्राष्ट्रिय विमानस्थलमा स्वागत गरे ।
नेपाल बक्सिङ संघका अध्यक्ष राम अवाले विशेष कारणले उपस्थित हुन नसकेकोले भिडियो कल मार्फत टोलीलाई बधाइ दिनुका साथै स्वागत गरेको बक्सिङ संघले जनाएको छ ।
अनिता एरोबिकको ब्रान्ड एम्बासडर
नेपाली टेबलटेनिस खेलाडी अनिता महर्जनलाई एरोबिक टेबलटेनिसले ब्रान्ड एम्बासडरमा नियुक्त गरेको छ । एरोबिकका प्रमुख कार्यकारी अधिकृत स्टिभ रो र अनिताबीच सम्झौता पत्रमा हस्ताक्षर भइसकेको छ ।
तीन वर्षका लागि एरोबिकको ब्रान्ड एम्बासडर बनेकी अनितालाई पार्टनर र प्रोमोटर पनि चयन गरिएको छ । करिब १५ वर्ष टेबलटेनिसमा संलग्न अनितालाई स्टिभले बटरफ्लाइ मार्फत प्रायोजन पनि गराएको बताइएको छ ।
अनिताले परिवारकै सहयोगमा सामाखुशीस्थित सरकारी धारामा एनिस पिङ पोङ क्लब पनि स्थापन गरेकी छन् । अनिता उक्त क्लबको प्रमुख कार्यकारी अधिकृत हुन् । विश्व टबेलटेनिस दिवसका अवसरमा अनितालाई ‘फिमेल प्रोमोटर’ मा चयन गरिएको अनिता स्वयंले जानकारी गराइन् ।
Comments
