नेपाल पत्रकार महासंघमा नयाँ नेतृत्व चयनका लागि मतदान काएमै, ६५ प्रतिशत मत खसेको अनुमान
२५ चैत, काठमाडौं । नेपाल पत्रकार महासंघमा नयाँ नेतृत्व चयनका लागि मतदान सुरु भएको छ । पत्रकारहरुको छाता संगठन महासंघको केन्द्रीय, प्रादेशिक र स्थानीय तहको नेतृत्व छनोटका लागि बिहान ९ बजेदेखि मतदान सुरु भएको हो ।
मतदान साँझ ४ बजेसम्म चल्ने नेपाल पत्रकार महासंघ केन्द्रीय निर्वाचन समितिले जनाएको छ । नेपाल पत्रकार महासंघको प्रत्यक्ष निर्वाचन मार्फत केन्द्र, प्रदेश र जिल्ला शाखाहरुमा नेतृत्व चयनका लागि भएको निर्वाचनमा देशभरीबाट दिउसो ३ बजेसम्ममा ६५ प्रतिशत मत खसेको नेपाल पत्रकार महासंघको केन्द्रीय निर्वाचन समितिले जनाएको छ ।
यसपटक केन्द्रीय अध्यक्ष पदका लागि विपुल पोखरेल, निर्मला शर्मा र गजेन्द्र बुढाथोकी चुनावी मैदानमा उत्रिएका छन् । पोखरेल नेपाल प्रेस युनियन, प्रेस सेन्टर र प्रेस चौतारी (खनाल–नेपाल) समूहसहितका विभिन्न ११ वटा संगठनका तर्फबाट उम्मेदवार बनेका हुन् । त्यस्तै निर्मला शर्मा प्रेस चौतारी(ओली समूह) र बुढाथोकी स्वतन्त्र रुपमा अध्यक्षको दौडमा रहेका छन् । मतदानका लागि बिहान ९ बजेदेखि साँझ ५ बजेसम्म मतदान गर्ने व्यवस्था रहेको समितिले जनाएको छ ।
यस पटकको निर्वाचनमा आ–आफ्नो प्रदेशबाटै केन्द्रीय नेतृत्वलाई मत दिन मिल्ने व्यवस्था गरिएको छ । त्यस्तै काठमाडौं उपत्यकामा प्रतिष्ठान सदस्यका लागि विभिन्न १९ वटा मतदान केन्द्र तोकिएको छ । त्यस्तै एसोसियट सदस्यका लागि दशरथ रंगशालामा मतदान केन्द्र तोकिएको छ ।