पेरिसमा एक महिना लकडाउन, तेस्रो लहरको कोरोना संक्रमण फैलने डर
Advertisement
०८ चैत, बीबीसी । तेस्रो लहरको कोरोना संक्रमणको खतरा बढेपछि फ्रान्सको राजधानी पेरिस एक महिनाका लागि लकडाउनमा जाने भएको छ । २ करोड १० लाख मानिसहरु बसोबास गर्ने १६ क्षेत्रमा शुक्रबार मध्यरात देखि यो लकडाउन कार्यन्वयन हुने बताइएको छ ।
तर अहिलेका नियमहरु यसअघिका लकडाउनमा जति कडा नहुने प्रधानमन्त्री जिन केसटेक्सले बताएका हुन् । पछिल्लो २४ घण्टामा फ्रान्समा ३५ हजार भन्दा धेरै नयाँ संक्रमितहरु थपिएका छन् । यस्तोमा प्रधानमन्त्री जिनले रोयटर्ससँग कुरा गर्दै अहिलेको फैलावटलाई नियन्त्रण बाहिर जान नदिने आफूहरुको जिम्मेवारी भएको बताएका छन् ।
यसमा पनि विशेषगरी पेरिसमा अवस्था चिन्ताजनक भएको बताइएको छ जहाँ इन्टेसिभ केयरमा १२,०० जनालाई राखिएको छ ।
गम्भीर बिरामीहरुको यो सङ्ख्या नोभेम्बरको दोस्रो लहर भन्दा धेरै भएको स्वास्थ्य मन्त्री ओलिभिअर भेरानले बताए । यता गर्मीयाम सुरु भएपछि पर्यटकहरुको चहलपहल बढ्ने अपेक्षा गरिरहेका पेरिस क्षेत्रका व्यवसायीहरुमा यसले अधिक नोक्सान पुर्याउनेबारे भने चिन्ता व्यक्त गरिएको छ ।
नयाँ लकडाउन अन्र्तगत अतिआवश्यक बाहेकका सबै कामकाज बन्द गर्न लगाइनेछ तर स्कुलहरु चाहिँ खुला रहने भनिएको छ । मानिसहरुलाई आफ्नो घरको १० किलोमिटरसम्म एक्सरसाइज गर्न दिइनेछ तर देशका अन्य भूभागमा बिना कुनै विशेष कारण भ्रमण गर्न अनुमति छैन । त्यस्तै प्रभावित क्षेत्रका मानिसहरुले चाहिँ घर छाड्नु परेमा यसको कारण बताउँदै आवेदन फारम भर्नुपर्ने हुन्छ ।
फ्रान्सको देशव्यापी कफ्र्यु भने यथावत रहने बताइएको छ । अबबाट बिहान ७ बजेदेखि सो कफ्र्यु हट्नेछ ।
खोप अभियानमा कमजोर देखिएकाप्रति फ्रान्स सरकार आलोचित भइरहेका बेलामा लकडाउनबारे नयाँ घोषणा गरिएको हो ।
यसअघि युरोपेली मुलुकहरुमा एस्ट्राजेनेकाको खोप लगाएपछि रगत जम्ने समस्या देखिएका विभिन्न रिपोर्ट आएका थिए जसपछि फ्रान्स सहित धेरै देशहरुले यसको प्रयोगमा रोक लगाएका हुन् । तर युरोपेली निरीक्षक इएमएले थप रिसर्चपछि यसलाई पूर्ण सुरक्षित घोषणा गरेको छ ।
यस्तोमा शुक्रबारदेखि नै फ्रान्स्मा पनि देशभर एस्ट्राजेनेका खोपको प्रयोग पुनः सुचारु गरिने मन्त्री जिनले बताए । यसमा कुनै समस्या छैन भन्ने पुष्टि गर्न उनी आफैँले पहिले खोप लगाउने पनि जिनले बताएका हुन् । हालै गरिएको एक सर्वेक्षणमा चाहिँ फ्रान्सका २० प्रतिशत नागरिकले मात्र यस खोपलाई विश्वसनीय मान्ने गरेको पत्ता लागेको थियो ।
मल्टिमिडिया ग्यालरी
Comments
