२८ फागुन, एजेन्सी । इंग्लिस क्लब आर्सनलले युरोपा लिगको प्रि–क्वाटरफाइनलको पहिलो लेगमा ग्रीसको ओलेम्पियाकोसलाई उसकै मैदानमा ३–१ को जित निकालेको छ ।
ओलम्पियाकोसको मैदानमा बिहीबार राति भएको खेलमा आर्सनलको जितमा मार्टिन ओडगार्ड, गाव्रियल र मोहमेद इलानेले गोल गरे । युसेफ इल अरवीले सान्त्वना गेाल फर्काए ।
खेलको ३४ औं मिनेटमा मार्टिन ओडेगार्डको गोलबाट आर्सनलले अग्रता लिएको थियो । ५८औं मिनेटमा युसेफ इल अरवीले गोल गर्दै खेललाई १–१ गोलको बराबरीमा ल्याए ।
८० औं मिनेटमा गाब्रियलले विलियनको पासमा गोल गर्दै आर्सनललाई २–१ ले अघि बढाए । ८५औं मिनेटमा मोहमेद इलानेले गोल गर्दै आर्सनललाई ३–१ को सहज जित दिलाए ।
महत्वपूर्ण जितसँगै आर्सनलले युरोपा लिगको क्वाटरफाइनलमा पुग्ने सम्भावना बलियो बनाएको छ । दोस्रो लेग आर्सनलको मैदानमा १८ मार्चमा हुनेछ ।
अर्काे खेलमा इंग्लिस क्लब म्यानचेस्टर युनाइटेड र इटालियन क्लब एसी मिलानले १–१ गोलको बराबरी खेलेका छन् ।
ओल्डट्राफोर्डमा बिहीबार राति भएको खेलमा युनाइटेडका आमद दियालोले गोल गर्दा मिलानका सिमोन किएरले बराबरी गोल फर्काएका थिए । प्रतिस्पर्धात्मक खेलको पहिलो हाफमा गोलरहित बराबरीमा सकिदा दोस्रो हाफमा दुई गोल भएको थियो ।
खेलको १२ औं मिनेटमा फ्रान्क केस्सीको गोलले भिएआरबाट मान्यता नपाउदा मिलान अग्रता लिनबाट चुकेको थियो । ५०औं मिनेटमा सब्सिच्युट आमद दियालोले गोल गर्दै युनाइटेडलाई १–० को अग्रता दिलाए । एन्थोनी मार्सियालको स्थानमा मैदान छिरेका आमदले ब्रुनो फर्नान्डेसको पासमा गोल गरेका थिए ।
इन्ज्युरी समयको थप गरिएको दोस्रो मिनेटमा सिमोन किएरले गोल गर्दै मिलानलाई हारबाट जोगाए । उनले राडे क्रुनिकको पासमा गोल गरेका थिए । यो बराबरीसँगै दुवै टोलीको क्वाटरफाइनल पुग्ने सम्भावना रहेको छ । अन्तिम समयमा सम्हालिन नसक्दा म्यानचेस्टर युनाइटेडले मिलानसँग बराबरी खेल्न बाध्य भएकेा हो ।
दोस्रो लेग १९ मार्चमा हुनेछ ।
अन्य खेलका नतिजा
आयाक्स विरुद्ध योङ ब्वाइज (३–०), डाइनामो किएभ विरुद्ध भिल्लारियल (०–२), स्लाभिया प्रागविरुद्ध रेन्जर्स (१–१), ग्रानडाविरुद्ध मोल्दे (२–०), ओलम्पियाकोस विरुद्ध आर्सनल (१–३), रोमा विरुद्ध साख्तर डोनेस्क (३–०) र टोटनहम विरुद्ध डिनामो जाग्रिव (२–०) ।
Comments