Nepal's No. 1 Digital News Portal, Business, Corporate, Tourism, Politics, Sports, Entertainment, digitalkhabar.com ...express media network

बैंकलाई ब्रोकर लाइसेन्सको सट्टा ‘ब्रोकर’लाई नै एजेन्ट राख्ने तयारीमा धितोपत्र बोर्ड

0 70

२४ फाल्गुन, काठमाडौं । बैंकलाई सहायक कम्पनीमार्फत ब्रोकर लाइसेन्स दिने कुरालाई पन्छाएर नेपाल धितोपत्र बोर्डले ब्रोकर कम्पनीहरुलाई एजेन्ट राख्न दिने नीति अघि बढाएको छ ।

यसका लागि छलफल चलिरहेको धितोपत्र बोर्ड स्रोतले बताएको छ । साथै, प्रदेशस्तरमा पनि ब्रोकरलाई पुर्याउन नयाँ ब्रोकर कम्पनीलाई लाइसेन्स दिने सम्बन्धमा पनि बोर्डमा छलफल भएको छ ।

यता, सेयर ब्रोकरलाई एजेन्ट राख्न दिने व्यवस्था आगामी आर्थिक वर्षबाट कार्यान्वयन गर्ने गरी आन्तरिक तयारीहरु भइरहेको धितोपत्र बोर्डले बताएको छ । यसका लागि निर्देशिका समेत तयार भएको बोर्ड स्रोतको भनाई छ । बोर्डले केही समयअघि यस सम्बन्धमा अध्ययन गर्न आफ्ना उपकार्यकारी निर्देशक डा. नवराज अधिकारीको संयोजकत्वमा एक समिति बनाएको थियो ।

यस समितिले अध्ययन रिपोर्टसहित निर्देशिका नै तयार बनाइसकेको छ । यसका लागि हाल कार्यान्वयनमा रहेको धितोपत्र व्यवसायी नियमावलीको व्यवस्थामा थप स्पष्ट पार्नुपर्ने देखिएकाले संशोधन प्रस्ताव अर्थ मन्त्रालयमा पठाउन लागिएको छ । विगत लामो समयदेखि आम लगानीकर्ताले माग गर्दै आएको बैंकलाई सहायक कम्पनीमार्फत ब्रोकर लाइसेन्स दिने विषय अब त्यसै अलपत्र पर्ने भएको छ ।

करिब अन्तिम चरणमा पुगेको यो प्रक्रियालाई बोर्ड अध्यक्ष भिष्मराज ढुंगानाले उल्ट्याउन लगाएका हुन् । धितोपत्र बोर्ड स्रोत भन्छ, ‘बोर्ड अध्यक्ष कुनै पनि हालतमा बैंकलाई सहायक कम्पनीमार्फत ब्रोकर लाइसेन्स दिन हुन्न् भन्ने पक्षमा अडिग हुनुहुन्छ ।’ त्यसैले अब यो विषय कागजमै सीमित हुने भएको छ ।  

यसअघि बैंकलाई लाइसेन्स दिने प्रक्रिया एक हिसाबले अघि बढिसकेको अवस्थामा अर्थ समितिले एकाएक रोक्दै थप अध्ययन गर्न भनेर उपसमिति गठन गरेको थियो । त्यसो त उप समिति गठन भएको लामो समयसम्म पनि त्यसले प्रतिवेदन नै सार्वजनिक गरेन । सरोकारवाला निकायको चर्को दबाबका बीच बल्लतल्ल उप समितिले वाणिज्य बैंकहरुलाई सहायक कम्पनीमार्फत ब्रोकर लाइसेन्स दिनु उचित हुने निष्कर्ष निकालेको जानकारी गराइयो । तर यसरी दिन हुने भनिएको पनि लामो समय बितिसक्दा काम अघि बढ्न सकेन ।

अब त प्रक्रिया नै रद्द गर्नेतर्फ यो विषय अघि बढेको छ । यसको नयाँ विकल्प खोजी गर्न बोर्ड लागिपरेको छ । विगत लामो समयदेखि लगानीकर्ताले बैंकलाई सहायक कम्पनीमार्फत ब्रोकर लाइसेन्स दिन माग गर्दै आएका भए पनि उनीहरुको आवाज पनि विशेषगरी बजार घटेका बेलामा जोडतोडका साथ उठ्ने गरेको छ ।

बजार बढ्न थालेपछि यो सँगै अन्य थुप्रै मुद्दाहरु त्यत्तिकै ओझेलमा पर्ने गरेका छन् । अहिले बैंकलाई ब्रोकर लाइसेन्सको विषयमा पनि त्यही भएको हो । किन भने यतिबेला सेयर बजार बुल रनमा छ । बजार बुलिस भएका बेला सेयर बजारका महत्वपूर्ण मुद्दाहरु पनि विस्तारै छाँयामा पर्दै गएका छन् । बैंकलाई ब्रोकर लाइसेन्स दिएमा पुँजी बजारको दायरा फराकिलो हुने, दूरदराजका लगानीकर्ताको पनि सहजै पहुँच पुग्ने लगानीकर्ताको भनाई रहँदै आएको छ ।

त्यसो त यो मुद्दा पनि विवादरहित भने छैन । विशेषगरी ब्रोकर व्यवसायीहरुले यसको विरोध गरेका छन् । अहिले भएकै ब्रोकरलाई टिक्न गाह्रो भइरहेको उनीहरुको भनाई छ । अनि, अर्काथरीले बैंकलाई ब्रोकरको काम गर्न दिंदा चलखेल थप बढ्न सक्ने, इन्साइडर कारोबारको खतरा बढ्ने पनि बताइरहेका छन् ।  

आर्थिक वर्ष २०७४–०७५ को बजेटमा नै बैंकलाई ब्रोकर लाइसेन्स दिने विषय समावेश गरिएको थियो । यस्तै, पुँजी बजार सुधार र विस्तारका लागि राष्ट्र बैंकका डेपुटी गभर्नरको संयोजकत्वमा गठन गरिएको कमिटीले सिफारिस गरेको ५८ बुँदे सुझावमा पनि बैंकलाई ब्रोकर लाइसेन्स दिनुपर्ने विषयलाई उच्च प्राथमिकतामा राखिएको थियो । 

सहायक कम्पनीमार्फत ब्रोकर लाइसेन्स दिन पाउने व्यवस्था राष्ट्र बैंकले गरेपछि करिब डेढ दर्जन बैंकले यो विषय समावेश गरेर आफ्नो प्रबन्धपत्र तथा नियमावली संशोधन समेत गरिसकेका छन् । तीमध्ये केहीले सहायक कम्पनी दर्ता गरेर ब्रोकर लाइसेन्सका लागि नेप्सेमा आवेदनसमेत दिएका थिए । तर, अब यी कम्पनीहरुले ब्रोकरको काम गर्न पाउने हुन् या होइनन् भने चाहिँ थप अन्योलको विषय बनेको छ । 


- Advertisement -


मल्टिमिडिया ग्यालरी

Comments

comments

Subscribe to our newsletter
Sign up here to get the latest news, updates and special offers delivered directly to your inbox.
You can unsubscribe at any time
Leave A Reply

Your email address will not be published.