Advertisement
२३ फागुन, काठमाडौं । लागूऔषध नियन्त्रण ब्यूरो कोटेश्वरको आयोजना तथा सेभ द चिल्ड्रेन/ग्लोबल फण्ड र रिकभरिङ नेपालको सहयोगमा होटल याक एण्ड यतिमा लागूऔषध प्रयोग तथा जोखिम न्यूनीकरणका लागि १ दिवसीय अभिमुखिकरण कार्यक्रम सुरु भएको छ ।
उक्त कार्यक्रमको सोही होटलमा आइतबार आयोजित कार्यक्रममा लागूऔषध नियन्त्रण ब्यूरो कोटेश्वरका प्रमुख प्रहरी वरिष्ठ उपरीक्षक दिलिप कुमार चौधरीले उद्घाटन गर्नुभयो ।
उद्घाटनका अवसरमा प्रहरी वरिष्ठ उपरीक्षक चौधरीले लागूऔषध प्रयोगकर्ताले समाज, देश तथा स्वयंलाई नोक्सानी पुर्याएकोले यससँग सम्बन्धित संघ संस्था तथा पुनर्स्थापना केन्द्र र कानुन कार्यान्वयन गर्ने निकाय बिचमा सहकार्य र समन्वय हुनुपर्ने बताउनुभयो ।
एचआइभि तथा यौन रोग नियन्त्रण केन्द्रका सिनियर पब्लिक हेल्थ अफिसर नन्दराज अवस्थी, गृह मन्त्रालय लागूऔषध नियन्त्रण शाखाका शाखा प्रमुख उपसचिव अर्जुन भण्डारी, सेभ द चिल्ड्रेन/ग्लोबल फण्डका डेपुटी चिफ अफ पार्टी राजन भट्टराई र रिकभरी नेपालका प्रमुख कार्यकारी अधिकृत विष्णु शर्मा फुँयालले समेत आ-आफ्नो मन्तव्य व्यक्त गर्नुभएको उक्त कार्यक्रममा अभिमुखिकरण कार्यक्रमका संयोजक प्रहरी नायव उपरीक्षक फणिन्द्र प्रसाइँले कार्यक्रमबारे जानकारी गराउनुभएको थियो ।
साथै उपत्यका बाहिर ओएसटि सेन्टरहरू रहेका स्थानहरू मोरङ, पर्सा, चितवन, बुटवल, नेपालगञ्ज, पोखरा समेतमा फागुन २५ गते यस्तै कार्यक्रम सञ्चालन हुन गईरहेको प्रहरी नायव उपरीक्षक प्रसाइँले जानकारी दिनुभयो ।
आजै समापन हुने कार्यक्रममा लागूऔषध प्रयोगको अवस्था, प्रयोगको चरण, यसले पार्न सक्ने असर र लागूऔषध न्यूनीकरणका लागि प्रहरीको भूमिका तथा जोखिम न्यूनीकरणका लागि सञ्चालित ओएसटि केन्द्रसँगको प्रहरी समन्वय लगायतका बिषयमा लागूऔषध नियन्त्रण ब्यूरोबाट प्रस्तुतीकरण हुने कार्यक्रम रहेको छ ।
अभिमुखिकरण कार्यक्रममा महानगरीय प्रहरी परिसरहरू काठमाडौं, ललितपुर र भक्तपुरबाट १५ जना र लागूऔषध नियन्त्रण ब्यूरो कोटेश्वरबाट ५ जना गरी जम्मा २० प्रहरी अधिकृतहरूको सहभागिता रहेको छ ।
Comments
