सरकारद्वारा ताप्लेजुङका आगालागी पीडितलाई प्रतिपरिवार ५० हजार राहत दिइने
Advertisement
२१ फाल्गुन, विराटनगर । ताप्लेजुङको मेरिङदेन ३, दोभानका आगलागी पीडितलाई प्रदेश १ सरकारले राहत सामग्री उपलब्ध गराएको छ ।
आगलागीले ध्वस्त भएको बस्तीमा पुगेर प्रदेश १ का मुख्यमन्त्री शेरधन राईले बिहीबार राहत सामग्री उपलब्ध गराउनुका साथै पीडितलाई थप राहत प्याकेजसमेत घोषणा गरेका छन् ।
प्रदेश सरकारले प्रतिपरिवार ५० हजार रुपैयाँ नगद उपलब्ध गराउने मुख्यमन्त्री राईले दोभानबस्तीमा पुगेर बताए । त्यस्तै डेराम बस्दै आएका परिवारलाई प्रतिपरिवार ३० हजार रुपैयाँ नगद उपलब्ध गराउने पनि मुख्यमन्त्री राईले सुनाए ।
आगलागी पीडितहरुको अवस्था बुझ्न घटनास्थल पुगेका मुख्यमन्त्री राईले पीडितहरुको मागअनुसार ग्यास सिलिन्डर, चुलो र प्रेसर कुकरसमेत उपलब्ध गराउने आश्वासन दिए । उनले भने, “संघीय सरकारसँग समन्वय गरेर पीडित परिवारलाई थप सहयोग गर्न प्रदेश सरकार लागि परेको छ ।”
प्रदेश सरकारका तर्फबाट पीडित परिवारलाई तत्कालका लागि १८ सय केजी चामल, २५० केजी दाल, नुन, तेललगायत खाद्यान्न र म्याट्रेस बिहीबारै हस्तान्तरण गरिएको छ । आगलागीमा परी घाइते भएका मेरिङदेन ३ दोभानका भोला पौडेललाई थप उपचारका लागि काठमाडौं पठाइएको छ ।
मुख्यमन्त्री राईका साथमा आन्तरिक मामिला तथा कानुनमन्त्री हिक्मतकुमार कार्की, प्रदेशसभा सदस्य टंक आङबुहाङ, प्रतापप्रकाश हाङगामलगायत आगलागी बस्ती पुगेका थिए ।
Comments
