Nepal's No. 1 Digital News Portal, Business, Corporate, Tourism, Politics, Sports, Entertainment, digitalkhabar.com ...express media network

सरकारले पूर्ण जिम्मेवारीका साथ खोप अभियान सञ्चालन गरेको छ : मन्त्री त्रिपाठी

0 70

१६ फाल्गुन, काठमाडौं । स्वास्थ्य तथा जनसङ्ख्या मन्त्री हृदयेस त्रिपाठीले आगामी फाल्गुण २३ गतेदेखि सुरु हुने कोरोनाविरुद्ध दोस्रो चरणको खोप अभियानलाई प्रभावकारी बनाउन तीनै तहको सरकारले संयुक्त प्रयास अघि बढाएको बताउनु भएको छ ।

मन्त्रालयले आज काठमाडौँमा गरेको प्रधान सम्पादकहरुसँंगको अन्तर्क्रियामा मन्त्री त्रिपाठीले ५५ वर्षदेखि माथि उमेर समूहका व्यक्तिहरू संवेदनशील र बढी जोखिमको क्षेत्र पनि भएकाले सरकारले पूर्ण जिम्मेवारीका साथ खोप अभियान सञ्चालन गर्न थालेको जानकारी दिनुभयो ।

उहाँले हालसम्म ४ लाख २९ हजारभन्दा बढी मानिसले कोरोना विरुद्धको खोप लगाएका मध्ये कसैलाई पनि जटिल समस्या नदेखिएको र नेपालले प्रयोग गरेको खोप विश्वका ५७ देशले प्रयोग गरिरहेकाले कोभिशिल्ड खोपको सुरक्षालाई लिएर सरकार पूर्णतः विश्वस्त रहेको बताउनुभयो ।

विश्वका एक सयभन्दा बढी देशले अझै खोप कार्यक्रम सुरु गर्न नसकिरहेको अवस्थामा नेपाल सरकारले खोपको आवश्यक बन्दोबस्त गरी अभियान सञ्चालनमा ल्याएको र क्रमशः सबैलाई खोप कार्यक्रममा समावेश गरिने भएकाले ढुक्क भएर यो अवसरको सदुपयोग गर्न आग्रह गर्नुभयो ।

मन्त्री त्रिपाठीले आफ्नो उमेर पनि ५५ वर्षमाथिको भएकाले नियम मिचेर पहिलो चरणमा खोप नलगाएको बताउनुहुँदै अबको कार्यक्रममा आफूले पनि खोप लगाउने जानकारी दिनुभयो ।

मन्त्री त्रिपाठीले खोप खरिददेखि लगाउनेसम्मका सबै प्रक्रिया पारदर्शी, न्यायसङ्गत र कानुनबमोजिम हुने पनि स्पष्ट पार्नुभयो ।

उहाँले अब निरन्तर रुपमा खोप अभियान अघि बढाउने सरकारको योजना रहेको बताउनुहुँदै प्राथमिकता प्राप्त समुदायलाई सरकारका तर्फबाट निःशुल्क खोप लगाइसकेपछि निजी क्षेत्रलाई खोप आयात र खोप कार्यक्रम सञ्चालन गर्न दिइने बताउनुभयो ।

कार्यक्रममा स्वास्थ्य तथा जनसङ्ख्या मन्त्रालयका सचिव लक्ष्मण अर्यालले २० लाख मात्रा खोप खरिद गरिएको मध्ये १० लाख मात्रा आइसकेको, १० लाख मात्रा आउने क्रममा रहेको र थप ५० लाख मात्रा खरिदको तयारी करिब अन्तिममा पुगेको जानकारी दिनुभयो ।

उहाँले फाल्गुण २३ देखि सुरु हुने अभियान देशका ६ हजार खोप केन्द्रमा सञ्चालन हुने, उमेरका कारणले खोप केन्द्र जान नसक्नेहरूका लागि विशेष व्यवस्था गरिने र त्यसका लागि खोप, जनशक्तिलगायतका सबै बन्दोबस्त भइसकेको बताउनुभयो ।


- Advertisement -


मल्टिमिडिया ग्यालरी

Comments

comments

Subscribe to our newsletter
Sign up here to get the latest news, updates and special offers delivered directly to your inbox.
You can unsubscribe at any time
Leave A Reply

Your email address will not be published.