Nepal's No. 1 Digital News Portal, Business, Corporate, Tourism, Politics, Sports, Entertainment, digitalkhabar.com ...express media network

नशालु पदार्थ सुँघाएर बेहोस बनाएर मध्यरातमा लुटपाट

0 71

१५ फाल्गुन, विराटनगर । महिलालाई नशालु पदार्थ सुँघाएर बेहोस बनाउँदै मोरङको केराबारी गाउँपालिका–७ चौबिसेस्थित एउटा घरभित्र शुक्रबार मध्यरातमा लुटपाट मच्चाइएको छ ।

घरधनी गणेशबहादुर विक काम विशेषले केराबारीकै पाटी गाउँतिर गएको र घरमा दुई नाबालक छोराछोरीसहित उनकी श्रीमती मात्रै भएको अवस्थामा लुटपाट मच्चाइएको हो । वडाध्यक्ष नारायणप्रसाद चेम्जोङ लिम्बूले घटना भएका बेला ११ र १३ वर्षका छोराछोरीसँग गणेशबहादुरकी श्रीमती उर्मिला विक मात्रै घरमा रहेको जानकारी दिए ।

उनका अनुसार घरमा पालेको भैँसीको पाडो बाँधेको ठाउँबाट खुस्किएको हुनसक्ने ठानेर राति ११ बजे घरको ढोका खोलेर उर्मिलाले बाहिर निस्कने प्रयास गरेकी थिइन् । तर ढोकाबाट बाहिर निस्कन नपाउँदै मास्क लगाएर आएका अपरिचित दुई नकावधारी युवाले नियन्त्रणमा लिएर नशालु पदार्थ सुँघाउँदै उनलाई बेहोस बनाएर घरभित्र पसी लुटपाट मच्चाएको लिम्बूको भनाइ छ ।

प्रहरीले घटनाका बारेमा अनुसन्धान थालेको छ । मोरङ प्रहरी प्रमुख एसपी सन्तोष खड्काले लुटपाटमा संलग्नले घरभित्र रहेको ४० हजार रुपैयाँ नगद र एक तोलको सुनको सिक्री लुटेर लगेको जानकारी दिए । भतिज द्रोण विकले सापटीवापत लगेको उक्त पैसा उर्मिलालाई दुई दिनअघि मात्रै फिर्ता दिएका हुन् ।

द्रोणले केही दिनअघि ४५ हजार रुपैयाँ सापटी लगेका थिए । तर फिर्ता गरेपछि पाँच हजार खर्च भएको र बाँकी ४० हजार घरमै राखिएको अवस्थामा लुटिएको पुष्टि भएको प्रहरीले जनाएको छ । एसपी खड्काका अनुसार महिलालाई नशालु पदार्थ सुँघाए बेहोस बनाउँदै लुटपाट गरिएको खुलेको छ ।

‘मध्यरातमा घरको ढोकाबाट बाहिर निस्कन खोज्दा घाँटीमा समाउँदै नशालु पदार्थ सुँघाएपछि महिला बेहोस बनिछन्,’ उनले भने, ‘त्यसपछि दुई जना घरभित्र पसेर नगद र सुनको सिक्री लिएर फरार बनेको पाइयो ।’ शनिबार बिहानसम्म सामान्य अवस्थामा रहेर प्रहरीलाई घटनाका बारेमा जानकारी दिएकी उर्मिला शनिबार दिउँसोबाट पुनः बेहोस बनेकी छन् । उनले आफू होसमा आउँदा घरभित्र रहेको नगद र सुनको सिक्री लुटिएको अवस्थामा पाएको प्रहरीलाई बताएकी थिइन् ।

पुनः बेहोस बनेपछि स्थानीय स्वास्थ्य संस्थाले उपचार सम्भव नहुने जानकारी दिएर उनलाई थप उपचारका लागि सुविधा सम्पन्न अस्पतालमा रेफर गरेको जानकारी वडा अध्यक्ष लिम्बूले दिए । महिलामाथि कुनै कुटपिट र आक्रमण भने नभएको एसपी खड्काको भनाइ छ । उनले घटनामा संलग्नका बारेमा पहिचान हुन नसकेको र लुटपाट गर्नेको पहिचान एवं खोजी तीव्र पारिएको बताए ।


- Advertisement -


मल्टिमिडिया ग्यालरी

Comments

comments

Subscribe to our newsletter
Sign up here to get the latest news, updates and special offers delivered directly to your inbox.
You can unsubscribe at any time
Leave A Reply

Your email address will not be published.