Nepal's No. 1 Digital News Portal, Business, Corporate, Tourism, Politics, Sports, Entertainment, digitalkhabar.com ...express media network

तरकारी खेतीबाट आत्मनिर्भर बन्दै किसान, वार्षिक १५ लाख आम्दानी

0 95

०७ फागुन, नेपालगञ्ज । सामुहिक तरकारी खेती गरेर कोहलपुर नगरपालिका–१३ भरैयाका अधिकांश किसान आत्मनिर्भर बन्न थालेका छन् । कृषिलाई नै मुख्य पेशा बनाएका भरैयाका स्थानीय किसानले तरकारी खेती गरेर मौसममा न्यूनतम एक लाखदेखि पाँच लाख रुपियाँसम्म आम्दानी गर्दै आएको जनाएका छन् ।

परम्परागतरुपमा धानखेती गर्दै आएका उनीहरुले तरकारीमा आम्दानी बढी हुने देखिएपछि तरकारी खेतीमा जुटेका हुन् । धान खेतीमा मिहिनेत धेरै, उपलब्धि कम हुने भएकाले तरकारी खेती शुरु गरेको स्थानीय नरबहादुर बुढामगरले बताउनुभयो ।

तरकारी गोडमेल, मलजल गर्नुका साथै सिँचाइको व्यवस्थापनमै उनीहरुको दिन बित्ने गरेको बुढामगरको भनाइ छ । पहिलेको तुलनामा पछिल्लो समय तरकारी उत्पादन निकै बढेको बताउँदै मगर भन्नुहुन्छ, ‘ग्राहक घरमै आएर तरकारी किनेर लैजान्छन् ।’

यसअघि धान र गहुँखेती गर्दै आउनु भएका मगरले त्यसबाट लाउन खान पनि नपुगेपछि विसं २०५१ देखि तरकारी खेती शुरु गरेको बताउनुभयो । उहाँले अहिलेसम्म कुनै निकायबाट सहयोग नपाएको गुनासो पनि गर्नुभयो ।

प्रदेश र स्थानीय सरकारले कृषिमा थुप्रै बजेट छुट्याएको खबर सुनेपनि हालसम्म अनुदान नपाएको उहाँले बताउनुभयो । वार्षिक दुईदेखि पाँच लाख रुपियाँसम्म आम्दानी गर्दै आउनुभएका मगरले सोही रकमबाट घर परिवारको खर्च धानिरहनुभएको छ ।

भरैयाकै अर्का किसान शेरबहादुर वलीले पनि एक दशकदेखि तरकारी खेती गर्दै आएको बताउनुभएको छ । विभिन्न निकायबाट कृषिसम्बन्धी तालिम लिनुभएका वली विदेश गएर हन्टर खानु भन्दा नेपालमै तरकारी खेतीबाट मनग्य आम्दानी गर्न सकिने बताउनुहुन्छ ।

‘हामी चार भाइ मिलेर ३५ कट्ठामा तरकारी खेती शुरु गरेका छौँ,’ वलीले भन्नुभयो, ‘वार्षिक दुई लाख लगानी गरेर उब्जिएको तरकारीबाट १५ लाख बराबर आम्दानी हुने गरेको छ ।’ उहाँले कृषि पेशाबाटै २२ जनाको परिवारको खर्च चलाइरहेको पनि बताउनुभयो ।

समयमै बीउ र मल उपलब्ध नहुँदा सोचे जति उत्पादन गर्न नसकिएको वली बताउनुहुन्छ । उहाँले सरकारले कृषकको आवश्यकता पहिचान गरेर कृषि सामग्री वितरण नगरेको गुनासो पनि गर्नुभयो ।
सामूहिक तरकारी खेती गर्दै आएका त्यहाँका किसानले सागर कृषि सहकारीसमेत खोलेका छन् । सोही सहकारी मार्फत किसानले अटोरिक्सा समेत खरिद गरेका छन् । गाँउमा उत्पादन हुने तरकारी अटोरिक्सा मार्फत बजारसम्म पुग्ने भएकाले कृषकलाई बजारीकरणको समस्या नरहेको उनिहरु बताउँछन् ।

भारतबाट आउने विषादीयुक्त तरकारीसँग प्रतिस्पर्धा गर्नुपर्ने बाध्यता रहेको किसानको भनाइ छ । भारतबाट सस्तो मूल्यको तरकारी आउँदा गाउँमा उत्पादित अग्र्यानिक तरकारीले प्रतिस्पर्धा गर्न समस्या पर्ने गरेको उनीहरुले बताएका छन् ।


- Advertisement -


मल्टिमिडिया ग्यालरी

Comments

comments

Subscribe to our newsletter
Sign up here to get the latest news, updates and special offers delivered directly to your inbox.
You can unsubscribe at any time
Leave A Reply

Your email address will not be published.